IRAUNKORTASUN-ADIERAZLEAK

Iraunkortasun adierazleak berariazko neurri unitateak dituzten parametroak dira. Parametro horiei esker, uneoro jakin ahal izango dugu udalerriaren gizarte, ekonomi eta ingurumen egoera. Tresna horrek tokiko iraunkortasun maila ebaluatzen du.

Askotan, adierazle bakoitzak neurri multzo asko ditu. Jarraian, Iraunkortasun adierazleetako batzuk (IHOBEk adierazitako ohikoak) adierazten dira, eta udalerri bakoitzak aukeratu beharko du bere ekintza planerako egokien iruditzen zaiona.

Lurraldea eta Plangintza

• Eremu publiko irekien eta zerbitzuen erabilgarritasuna udalean. Adierazle honek eremu publiko irekietatik eta oinarrizko zerbitzuetatik 300 metrora edo gutxiagora bizi diren herritarren ehunekoa ebaluatzen du.
• Lurzoruaren erabilera jasangarria. Adierazle honek lurzorua modu jasangarrian kudeatzen ari den jakiteko lagungarri diren zenbait alderdi biltzen ditu. Horretarako, honakoak kalkulatzen dira: artifizializatutako lurzoruaren ehunekoa, utzita dagoen eta kutsatuta egon daitekeen lurraren azalera, etab.

Mugikortasuna eta Garraioa

• Tokiko mugikortasuna eta bidaiarien garraioa. Bizilagun batek egunero batez beste egiten duen desplazamendu kopurua, desplazamenduen batez besteko distantzia eta iraupena, desplazamenduak eragiten dituzten arrazoiak eta erabilitako garraiobideak aintzat hartzen dira, azterketa hori egiteko.
• Garraio azpiegituretan erabilitako udalerriko azaleraren banaketa. Adierazle honek udalerrian garraiobideen azpiegituretan erabilitako azaleraren banaketa, ebaluatzen du: oinezkoek erabiltzeko azalera, bizikletetarako bideak, garraio publiko kolektiboek erabiltzeko bideak eta motordun ibilgailuek erabiltzeko azalera.

Natura baliabideak

• Ur kontsumoa. Adierazle honek ur eskari osoa ebaluatzen du, bai eta etxeetan, industrian, nekazaritzan eta zerbitzuen sektorean erregistratutako kontsumoa ere. Bereziki, udaleko ur kontsumoa aztertzen da, bai eta banaketa sarearen ihesek eragindako galerak ere.
• Energia kontsumoa. Honek energia, gas natural eta energia elektriko kontsumo osoa ebaluatzen du, bai eta etxebizitzei eta jarduera sektoreei dagokiena ere, udal gastua barne.

Hondakinak

• Hondakinen sorrera eta kudeaketa. Biztanle batek egunero sortutako hondakinen bolumena, hondakin arriskutsuen sorrera, era berean hondakin bakoitzeko kudeaketa ere ebaluatzen da.
• Hondakinak uretara isurtzea. Uraren kalitatea aztertzen da kalitate biologikoaren ikuspegitik eta banakako edo udaleko hondakin uren saneamendu sistemarekin konektatuta dauden etxebizitzen ehunekoa kalkulatzen da.

Ingurumena udalerriko jardueretan integratzea

• Adierazle honek ingurumen kudeaketako sistemak dituzten enpresen, erakunde publikoen eta gobernuz kanpoko erakundeen kopurua balioesten du.

Inguru soziala eta ekonomikoa

• Pobrezia eta gizarte bazterketa. Oinarrizko errentako dirulaguntzak jasotzen dituzten familien kopurua aztertzen da.
• Langabezia tasa. Langabezian dauden biztanle aktiboen ehunekoa ebaluatzen da; adierazle hau urtean behin berrikusiko da.
• Herritarrek tokiko komunitatearekin duten gogobetetze maila: Adierazle honen bitartez, herritarrek tokiko komunitatearekin duten gogobetetze mailaren bilakaera aztertzen da. Horretarako, herritarrek komunitatea nahiz berariazko zenbait alderdi– nola baloratzen dituzten, herritarren gogobetetze maila, (oso ondo, nahiko ondo, erdi-ipurdi eta oso gaizki) jasoko da. Hona hemen alderdi horietako batzuk: udalerria, bizileku eta lan egiteko lekutzat; udalerriko etxebizitzen kalitatea; eta horien erabilgarritasuna eta eskuragarritasuna. Ikusi: Indicadores (erderaz)